ចាំ​សារ​នួន​ល្អង

យប់មួយទៀត បានរសាត់បណ្ដែតខ្លួនមកដល់... នាំឲ្យកង្វល់ដូចយប់មុនដែរ[សារសព្ទក្នុងចិត្ត(យប់មួយនោះ)]...!!!

យប់​មួយ​ទៀត បាន​រសាត់​បណ្ដែត​ខ្លួន​មកដល់...
នាំ​ឲ្យ​ខ្វាយខ្វល់​ដូច​យប់​មុន​ដែរ!!!

ចិត្ត​បង​សែន​នឹក​តែ​រូប​ស្រី

ពេញ​មួយ​រាត្រី​ចាំ​ជីវា

ឃើញ​អូន​អនឡាញ(១)បង​ខ្លោច​ផ្សា

ព្រោះ​ម្ចាស់​ស្នេហា​មិន​តប​ឆ្លើយ។

ភ្នែក​បង​សម្លឹង​មើល​តែ​ឆាត(២)

ចិត្ត​បង​សង្វាត​គិត​ត្រាណត្រើយ

យប់យន់​ព្រលប់​ស្ងាត់​ណាស់​ហើយ

ម្ចាស់​ចិត្ត​បង​អើយ​បង​រង់ចាំ។

ម្ដេច​អូន​អនឡាញ(៣)ធ្វើ​មិន​ដឹង?

ទ្រូង​រៀម​ប្រែ​តឹង​ឈឺ​ប្រេះស្រាំ

ឃើញ​អូន​អនឡាញ(៤)ជា​ប្រចាំ

ដួង​ចិត្ត​ខ្ទេចខ្ទាំ​ស្រាំ​ប្រេះឆា។

ចាំ​អូន​យូរ​ហើយ​ណា​មាសស្នេហ៍

អ៊ីនប័ក្ស(៥)ទទេ​មិន​ឃើញ​សារ

ឬ​អូន​រវល់​ឆាត(៦)ស្នេហា

នឹង​គេ​ជីវា​ភ្លេច​រូប​បង។

ឬ​អនឡាញ(៧)ចោល​ជាប់​សារសព្ទ

ថកហ្វូន(៨)ស្ងាត់ៗ​ថ្លៃ​ស្នេហ៍​ស្នង

អូន​ទុក​បង​ចោល​ឲ្យ​សៅហ្មង

អនឡាញ(៩)នួនល្អង​ឲ្យ​បង​ចាំ។

_________________________
(១) (៣) (៤) (៧) & (៩): Online
(២) & (៦): Chat
(៥): Inbox
(៨): Talk Phone

ភ្នំពេញុ, ១៩ មីនា ២០១៦
ស្មេរ៖ ហេង-រង្សី